විශේෂාංග

සැබෑ කාන්තා මූද්‍රාව ප්‍රකට කළ ෂිවෝනා ඇලෙක්සැන්ඩර්

Mrs. Sri Lanka World 2021 තරගාවලියේ Costume Mini Pageant වෙනුවෙන් ෂිවෝනා ඇලෙක්සැන්ඩර්ගේ ඉදිරිපත් කිරීම කාලානුරූපී මෙන්ම සහ දෘෂ්ටිවාදී අගයකින් යුක්ත වීම පැසසුම් සහගත ය.

අනූව දසකය මුල වසරක දී ලෝක රූ රැජණ තරගය සඳහා ශ්‍රී ලංකාව නියෝජනය කරමින් සහභාගී වුණු නුෂාරා ප්‍රනාන්දු හෝ චමිලා වික්‍රමසිංහ තම ප්‍රාසාංගික ඉදිරිපත්කිරීම ලෙස ‘උඩරට කඳුකර සිරියා පරදන රූබර මුහුණ ඔබේ’ නම් ගීතයට රංගනයක් ඉදිරිපත් කළා ය. ජාත්‍යන්තරය හඳුනන Ceylon Tea නාමය සමග මෙම ගීතය සංකල්පීය අගයකින් යුතු වුව ද දෘෂ්ටිවාදී අගයෙන් දිළිඳු බවේ පත්ලටම සිඳී යන්නකි. ‘රතැඟිලි දිගුකර මදහස නංවන තේ දළු නෙළන ළඳේ’ යන හැඳින්වීම වනාහී ප්‍රායෝගිකත්වයෙන් තොර ව්‍යාජ වර්ණනාවක් බවත් ‘අපි ණයගැති වෙමු සුකුමල දෑතට තේ දළු නෙළන ළඳේ’ යනු කිසිදා ඉටු නොකළ චාටු වදනින් හැඩ කළ පිළිණයක් බවත් වටහා ගන්නා විට සෞම්‍යමූර්ති තොණ්ඩාමන්ගේ මුණුබුරා ද මිය ගොස් ඔහුගේ ද පුත් ජීවන් තොණ්ඩාමන් රිය සිරසක් දෙබෑ කර හිස එළියට දමාගෙන කඳුකරයට අත වනා අවසාන ය. නමුත් රතැඟිලි හා සුකුමල දෑත් ඇති තේ දළු නෙළන ළඳුන් තවමත් රුපියල් දහසක අවම දෛනික වැටුපක් ඉල්ලා මහමගට බැස මදහස නංවමින් සිටී.

ඉදින්, ක්‍රිස්තු වර්ෂ 2021 දී ශ්‍රී ලංකා විවාහක රූ රැජණ කිරුළට තරග වදින ෂිවෝනා ඇලෙක්සැන්ඩර් ‘ඇඳුම් මෝස්තරය’ තුළ නිරූපණය කරන ගැහැනිය පිළිබඳ ඉසියුම් කතිකාව සිත්ගන්නාසුලු ය. 2008 වසරේ දී ලක්ෂාන්ත අතුකෝරල පල කළ ‘හිතග්ගිස්සෙ නැතක් මොට්ටු’ කාව්‍ය සංග්‍රහයේ එන කවියක් මෙසේ වේ.

වැඩ ඇරී
වැඩට යති
ගෑනු

ලක්ෂාන්තගේ කවියේ චිත්‍රණය වන ගැහැනිය ආත්ම විශ්වාසය සහ ප්‍රබෝධය ද සහිතව ෂිවෝනා තුළින් සාර්ථක ලෙස ප්‍රතිනිර්මාණය වී ඇත. ඒ හැරෙන්නට ඇය විසින් මෙහි දී දැනුවත්ව හෝ නොදැනුවත්ව භාවිතා කරන මුද්‍රාව තුළින් නිරූපණය වන ගැඹුරු අරුත සහ ශ්‍රී ලංකාව වැනි ආසියාතික රටක විවාහක කාන්තාවක් විෂයයෙහි ලා පෙන්නුම් කරන සහසම්බන්ධය අනර්ඝය.

මේ සේයාරුව දකින විට තායිලන්ත යුවතියන්ගේ ‘දහසක් යුගත් දෙවඟන’ හෙවත් Thousand Hands ප්‍රාසාංගික ඉදිරිපත් කිරීම නිරායාසයෙන් ම සිහි නැගෙනු ඇත. සැබැවින් ම එම අත් දහසේ නර්තනය ‍වනාහී 1987 වසරේ දී මුල්වරට චීනයේ ආබාධිත ප්‍රාසාංගික කලාකරුවන් පිරිසක් ඉදිරිපත් කළ නර්තනයකි. Dance of the thousand-hand Guanyin හෙවත් ‘දහසක් යුගත් ගුවන්යින්’ නර්තනය තුළින් නිරූපණය වන ගුවන්යින් (Guanyin) යනු බටහිර ආසියාතික මහායාන බෞද්ධ පසුබිම තුළ අවලෝකීතේස්වර බෝධිසත්ව සංකල්පයට පර්යාය නාමයකි.

පාසල් කාලයේ සිට ම බැඩ්මින්ටන්, බටහිර සංගීතය, එලකියුෂන් වැනි විෂයයන්ගෙන් ජාතික මට්ටමේ ජයග්‍රහණ ලබන දීප්තිමත් සිසුවියක ලෙස නම කියවා තිබූ ගම්පහ සිරිකුරුස විද්‍යාලයේ ෂිවෝනා ඇලෙක්සැන්ඩර් නම් කතෝලික තරුණිය, තමා නිරූපණය කරන මුද්‍රාවේ සංකල්ප මූලය වන ‘ගුවන්යින්’ යනු මහායාන බුද්ධාගම තුළ ‘අවලෝකීතේස්වර බෝධිසත්ව’ සංකල්පය ම බවත් ඒ බෝධිසත්ව රූපය නිරන්තරව ම ‘Goddess of Compassion’ හෙවත් ‘දයාවේ දෙවඟන’ ලෙසින් හැඳින්වෙන බවත් දැන සිටියාදැයි මම නොදනිමි.

නමුත් රූ රැජණ තරගයක ‘ඇඳුම් මෝස්තර’ ඉසව්වට සහභාගී වීමේ දී ජිපියොලේස් රෙදි කච්චි හතක එතූ බාර්බි බෝනික්කෙකු නොවී සිටීමට හැකි වීම ම ඇය තුළ තවමත් ඒ ෂිවෝනා ඇලෙක්සැන්ඩර් නම් බුද්ධිමත් දැරිය ජීවත්වන බවට සාක්ෂ්‍ය සපයයි. ඒ ෂිවෝනාට සුබ පතමි.


සහන් කසීර වික්‍රමසිංහ

Leave a Reply

Your email address will not be published. Required fields are marked *

සබැඳි ලිපි

Back to top button